കാപ്പി കുടിച്ചാല്‍ രാത്രി ഉറക്കം വരില്ല. തൂങ്ങുന്ന ഉറക്കത്തില്‍നിന്നുമുണരും. കാപ്പി കുടിച്ച് ക്ഷീണിച്ച് ഉറങ്ങുന്ന ചിലരെങ്കിലുമുണ്ട്. കാപ്പിപ്രേമികളെപ്പോലെ ചായപ്രേമികളുമുണ്ട്. കോഴിക്കോട്ടെ ഒരു ഗംഭീര പിയനിസ്റ്റായിരുന്ന ലാന്‍സലറ്റ് തോമസ് ചുക്കു വെള്ളത്തിനു പകരം മധുരമിടാത്ത കട്ടന്‍ ചായയാണ് കുടിക്കുക. ഫ്‌ളാസ്‌ക്കില്‍ നിറച്ചുവെയ്ക്കും. സല്‍ക്കരിച്ചു. കുടിച്ചു. നല്ല കയ്പ്പ്. ഒരു വാശിക്ക് ശീലിച്ചു.
അദ്ദേഹം രാത്രി ഉറങ്ങാറില്ലായിരുന്നു. അദ്ദേഹത്തിന്റെ ബംഗ്ലാവിന് രണ്ട് വാച്ച്‌മേന്മാരുണ്ടായിരുന്നു. ഒരാള്‍ രാവിലെ 6 മണിക്ക് പോവും. അടുത്ത ആള്‍ അപ്പോഴേയ്ക്കും എത്തും. അറുമണിക്ക്, ആള്‍ മാറാട്ടം നടക്കുമ്പോള്‍, ഉണരുന്നതിലും ഭേദം ഉറങ്ങാതിരിക്കുന്നതാണ്. അങ്ങനെ പറഞ്ഞ് ഒരു ചിരി ചിരിക്കും. ഇംഗ്ലീഷ് മാത്രം പറയുന്ന, ശ്യാമവര്‍ണ്ണത്തില്‍ തിളങ്ങുന്ന, തമിഴന്റെ ബ്രിട്ടീഷ് ചിരി. അദ്ദേഹം കാപ്പി കുടിക്കാതെ ഉറക്കമൊഴിക്കും. രാവിലെ ആറു മണിക്ക് ഉറങ്ങും.
ലാന്‍സല്‍റ്റ് തോമസ് പോയി. ശീലം മറന്നു.
കുറച്ച് പേടിയുള്ള കാപ്പി കുടിയന്മാര്‍ അല്പം മനസ്സാക്ഷിക്കുത്തോടെയാണ് കഫീന്‍ സേവയില്‍ ഹരം പിടിക്കാറ്. അക്കാലത്തിന്റെ ഏട് മറിഞ്ഞു. ആ പുസ്തകമേ ചിതലരിച്ചു. ഇനി ഒന്നും പേടിക്കാനില്ല, കുടിക്കൂ... കാപ്പി. ശാസ്ത്രമാണ് പറയുന്നത്...
ഒന്നര ബില്യണ്‍ വര്‍ഷങ്ങള്‍ക്ക് മുന്‍പ് മൈറ്റോകോണ്ട്രിയം എന്ന പേരുള്ള ഏകകോശ ജീവി (ജീവിക്കാന്‍ ഓക്‌സിജന്‍ ആവശ്യമില്ലാത്ത) വഴിയെപ്പോയ ഒരു ബാക്ടീരിയത്തില്‍ കുരുങ്ങിപ്പോയി. ബാക്ടീരിയം അതിനെ ഉപദ്രവിച്ചില്ല, ദഹിപ്പിച്ചതുമില്ല. അകത്ത് താമസിക്കാന്‍ അനുവദിച്ചു. പാര്‍ക്കാന്‍ നല്ല ഒരു ഇടം നല്കിയതിന് അത് നന്ദി കാട്ടി. ബാക്ടീരിയത്തിന്റെതന്നെ ഓക്‌സിജനും ഗ്ലൂക്കോസും ഉപയോഗിച്ച് അതിന് ഊര്‍ജ്ജം ഉത്പാദിപ്പിച്ചുകൊടുത്തു. ഈ കൂട്ടുകെട്ട് പരിണാമചക്രത്തിന്റെ കറക്കത്തിന് ആക്കം കൂട്ടി. ജീവന്‍ ഇന്നീക്കാണുംവിധം സങ്കീര്‍ണ്ണമായി. ജീവന്റെ ബാറ്ററിയായാണ് മൈറ്റോകോണ്ട്രിയ പൊതുവില്‍ അറിയപ്പെടുന്നത്. പുതിയ കണ്ടെത്തലുകള്‍ പറയുന്നു അത് ജീവന്റെ മദര്‍ബോര്‍ഡാണെന്ന്. ശരീരത്തിനുവേണ്ട എല്ലാ ആശയങ്ങളും പദ്ധതികളും ഈ മദര്‍ബോര്‍ഡിലാണ് രൂപപ്പെടുന്നത്.
പാര്‍ക്കിന്‍സണ്‍സ് പോലെയുള്ള രോഗങ്ങള്‍ ഉണ്ടാവുന്നത് മൈറ്റോകോണ്ട്രിയയുടെ പ്രവര്‍ത്തനം തകരാറിലാവുന്നതുകൊണ്ടാണെന്നാണ് അടുത്തിടെ വന്ന ഒരു ഗവേഷണം (ദി ഹിന്ദു, ഓഗസ്റ്റ് 10, സയന്‍സ് പേജ് കാണുക) സൂചിപ്പിക്കുന്നത്. കരളിലെ ഒരു കോശം കൊണ്ട് നടക്കുന്നത് നുറ് മൈറ്റോകോണ്ട്രിയകളെയാണ്; പേശികള്‍ ആയിരം; എന്നാല്‍ ബ്രെയ്‌നിലെ ഒരു ന്യൂറോണ്‍ കൊണ്ടുനടക്കുന്നത് രണ്ട് ദശ ലക്ഷം മൈറ്റോകോണ്ട്രിയകളെയാണ്. വെറുതെയല്ല എല്ലാവരും അവിടെ കൂടിയിരിക്കുന്നത്. ഊര്‍ജ്ജദാഹിയാണ് ബ്രെയ്ന്‍. സ്ഥിരമായി വ്യായാമം ചെയ്യുകയും നന്നായി കാപ്പി കുടിക്കുകയും പഴവര്‍ഗ്ഗ-പച്ചക്കറി ഭക്ഷണം മുടങ്ങാതെ കഴിക്കുകയും ചെയ്താല്‍ പാര്‍ക്കിന്‍സണ്‍സ് വിട്ടു നില്‍ക്കുമത്രെ. അതായത് മൈറ്റോകോണ്ട്രിയയ്ക്ക് കാപ്പി നന്നായി ബോധിക്കും എന്ന്. മൈറ്റോകോണ്ട്രിയം ഒരു കാപ്പി ഭ്രാന്തനോ? കാപ്പി ഇഷ്ടമാണെങ്കില്‍ കുടി തുടങ്ങിക്കോളൂ. രണ്ട് കപ്പ് കാപ്പി. ഒന്ന് മൈറ്റോക്കോണ്ട്രിയ്ക്ക്; ഒന്നെനിക്കും. അടുക്കളയ്ക്ക് കാപ്പി ബാര്‍ എന്ന് പേരിട്ടാലോ!
മുകുന്ദനുണ്ണി
Comments